Муус устар 16 күнүгэр Дьокуускайдааҕы Эрдэҕэс оҕо киинин (Детский (подростковый) Центр) үөрэнээччилэрин төрөппуттэригэр анаан «Созвездие» библиотекаҕа оҕону сахалыы иитии тула истиҥ-иһирэх кэпсэтии буолан ааста.
Бу күн «Айыы оҕото» сахалыы истииллээх альбом-кинигэ сурэхтэниитэ буолла. Бу альбом-кинигэни бэлэмнээбит, күн сиригэр таһаарбыт айымньылаах киһинэн буолар – Вероника Валерьевна Александрова – Эрэлкээнэ.
Вероника Александрова – түөрт оҕо амарах ийэтэ, журналист. Кини саха оҕото төрүөҕүттэн үс сааһыгар диэри улаатарын кэрдиис кэмнэргэ араартаан, ол кэмҥэ сайдыытын, чэгиэн-чэбдик буолуутун, туспа ураты иитиллиитин, уйулҕатын анааран, кэтээн көрөн төрөппүттэргэ көмө-өйөбүл буоллун диэн бу альбому бэлэмнээбит. Ону таһынан альбомҥа киирбиттэр Л.А.Афанасьев-Тэрис, Б.Н.Попов-Барылҕан, М.С.Иванов-Багдарыын Сүлбэ, А.Н.Павлов-Дабыл улэлэриттэн уонна «Саха сирэ» хаһыат «Биһик» рубрикатын матырыйаалларыттан тэттик сүбэлэр.
Төрөппүттэри кытта көрсүһүүгэ ыҥырыллыбыт ыалдьытынан буолла тумус туттар киһибит Лазарь Андреевич Афанасьев – Тэрис. Кини Айыыһыт алгыһын түһэрдэ, мустубут дьону арчылаата, оҕону сахалыы иитиигэ сүбэ-ама биэрдэ.
Ону кытта бэйэлэрин санааларынан үллэһиннилэр: Константин Барашков–Толлуман, кинорежиссер, «Алгысфильм» төрүттээччитэ; Венера Михайловна Охлопкова, «Далбар хотун» журнал редактора, журналист; Лидия Жарафовна Ефимова, «Созвездие» библиотека тутаах үлэһитэ; Юлия Тимофеевна Львова, Эрдэҕэс оҕо киинин дириэктэрин солбуйааччыта.
Бу күнү киэргэттилэр: «Ай-сулустар» этно-студия үөрэнээччилэрэ сэргэх нүөмэрдэринэн, «Палитра» уруһуй студиятын үөрэнээччилэрэ «Мин дьиэ кэргэним – мин дьолум!» быыстапкаларынан. Ону таһынан Интернет ситиминэн ыытыллыбыт лотерея оонньуутун түмүгүнэн «Айыы оҕото» альбом-кинигэ туттарылынна.
Бу көрсүһүүнү тэрийбит уонна ыалдьыттаабыт сайдам санаалаах бар дьоҥҥо истиҥ махталбытын тиэрдэбит.
Үөрүүлээх күннүтүгэр күннүүн күлсүн,
Олорор олоххут, инники кэскилгит
Дьолунан, ситиhиинэн толору буолуохтун!
